شاهنواز ٻرڙو، ڊاڪٽر: نامور اسڪالر ڊاڪٽر شاهنواز ٻرڙو ولد شير محمد ٻرڙو، پهرين مارچ 1938ع تي ڳوٺ گهٽهڙ، تعلقي قنبر ۾ پيدا ٿيو. سندس والد قنبر شهر جو نامور استاد هو. شاهنواز ابتدائي تعليم ڳوٺ مان، مئٽرڪ 1959ع ۾ گورنمينٽ هاءِ اسڪول لاڙڪاڻي مان، انٽر گورنمينٽ ڪاليج حيدرآباد مان، ايم ايس سي زولاجيءَ ۾ ايگريڪلچر يونيورسٽي فيصل آباد مان 1977ع ۾، سنڌ يونيورسٽيءَ مان ’سنڌ جي مختلف علائقن ۾ رهندڙ جهنگلي پکين جي جسم جي اندرين ۽ ٻاهرين حصن تي واقع ٿيندڙ مفت خور جيتن ۽ جيوڙن جو جائزو، موسمي تبديليءَ جو اثر ۽ انهن جي سڃاڻپ‘ جي عنوان سان زولاجي جي شعبي ۾ پروفيسر ڊاڪٽر شجاعت الاڪبر جي رهبريءَ ۾ پي. ايڇ. ڊي ڪئي. سنڏ ۾ سائنس جي مضمونن ۾ تحقيق جي کوٽ کي ڏسندي اهو هڪ اهم ڪم آهي. ڊاڪٽر شاهنواز ٻرڙي 1962ع ۾ وٽرنري آفيسر طور عملي زندگيءَ جي شروعات ڪئي. 1971ع ۾ سنڌ ايگريڪلچر يونيورسٽي ٽنڊي ڄام ۾ ليڪچرار مقرر ٿيو. 1980ع ۾ پروفيسر ٿيو، ان کان سواءِ ڊين آف فيڪلٽي پڻ رهيو. 1991ع ۾ زيڊ اي ڀٽو ايگريڪلچر ڪاليج ڏوڪريءَ ۾ پرنسپال مقرر ٿيو، جتان 1998ع ۾ رٽائر ڪيائين. ڊاڪٽر شاهنواز ٻرڙي سنڌيءَ ۽ انگريزيءَ ۾ ڪيترا مقالا ۽ مضمون لکيا، جيڪي سائنس مئگزين ۽ ٻين بين الاقوامي رسالن ۾ ڇپيا. شاهنواز ٻرڙو ڪيترن ئي شاگردن جو پي ايڇ ڊيءَ ۾ گائيڊ رهيو ۽ ڪيترائي سندس رهنمائيءَ ۾ پي. ايڇ. ڊي ڪري چڪا آهن. پاڻ هن وقت لاڙڪاڻي ۾ رهائش پذير آهي.
1938.03.01 عيسوي
نامور اسڪالر ڊاڪٽر شاهنواز ٻرڙو ولد شير محمد ٻرڙو، پهرين مارچ 1938ع تي ڳوٺ گهٽهڙ، تعلقي قنبر ۾ پيدا ٿيو.